Борче Гиноски, партиски обезбедувач на СДСМ, кој му се закануваше на новинарот Бранко Героски дека „ќе го бањаат во Вардар“ не е само „партиски член од бројното партиско членство во базата“, како што тврдеше портпаролот на партијата Костадин Костадинов, туку син на првиот човек во МЖ Транспорт, Тони Гиноски, исто така член на партиското обезбедување на СДСМ.

Тони Гиноски е вработен со години во Железница како котлар. Со доаѓањето на СДСМ на власт пред две години тој е унапреден во шофер на генералниот директор, тогаш член на СДСМ, но Гиноски почнува да ја практикува владејачката рутина на својот партиски шеф Зоран Заев „живи луѓе ќе јадеме“ кога на чело на МЖ Транспорт е поставен кадар на Беса.

Извори на Република велат дека Гиноски не се стега да се пофали дека добил аманет лично од шефот, сега кога нема нивни партиски човек на чело на Железници, тој да се грижи за претпријатието. А дека Гиноски ја сфатил работата сериозно, сведочат и вработени во МЖ Транспорт, кои се секојдневно изложени на тортурата и притисокот од „човекот на Заев“.

Упаѓа по канцеларии, нè проверува, именува и разрешува по сопствен клуч. Се заканува со ќотек или со Трубарево. Во нашата работа некој да ви рече дека ќе ве распореди во Трубарево, е како да ве испратил на Сибир. Директорите, пак, стојат простум пред него. Вклучувајќи го и генералниот, вели извор за Република.

Вработените се жалат дека со истиот жар настапува и неговиот син Борче, кој дошол во Железници како шофер „по препорака од тате“.

Самиот зборува дека откако се вработи кај нас, се запишал на приватен факултет. Го спремаат за директор. Не сфаќаат дека оваа работа е специфична и не може да директорува некој собран и донесен од улица. Па и 3 факултети да завршил, вели изворот.

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.