Пратениците во Собранието денеска ќе ја продолжат 116. седница на која се расправа по Предлог-законот за гаранција од државата за  Договор за заем од 179 милиони долари за дополнително финансирање на автопат Кичево – Охрид којшто ќе се склучи меѓу Експорт – импорт банката на Кина и Јавното претпријатие за државни патишта.

Министерот за транспорт и врски Горан Сугаревски вчера на пленарната седница истакна дека проценетата вредност на дополнителните финансиски средства за проектот за кој лани беше изгласан анекс на договорот од страна на Собранието, е вкупно  179.694.572 долари. Заемот ќе биде доделен со рок на отплата од 20 години и вклучен грејс период од пет години. Каматна стапка е фиксна и ќе изнесува два проценти на годишно ниво за целото времетраење на заемот.

Пратениците од власта и од опозицијата со меѓусебни обвинувања за како што велат, наводен криминал во однос на договорите за кредитирање на овој проект.

Од ВМРО-ДПМНЕ, велат, убедени се во криминалноста на овој договор за задолжувањето и прашуваат зошто вредноста на патот се зголемува за 40 проценти, ако досега се реалиизрани 76 отсто од активностите.

Пратениците од владеачката СДСМ и коалицијата, пак со став дека криминален и брзоплет бил пристапот на поранешната Влада која за проектот за изградба на автопатот Кичево – Охрид, ја задолжија земјата за 505 милиони долари, но во него не биле предвидени клучки и други важни позиции. Со овој анекс – договор, додаваат, се обезбедуваат пари за целосна изградба на автопатот до 2021 годинатоа, а цените на многу ставки се пониски во однос 1:3.

На дневен ред на оваа седница се и Предлог законите за изменување и дополнување на Законот за земјоделство и рурален развој, на Законот за административни службеници, на Законот за вработените во јавниот сектор, потоа на Предлог-законот за изменување и дополнување на Законот за податоци во електронски облик и електронски потпис, сите по скратена постапка. Меѓу точките се и Предлог законите за правата на заедниците кои се помалку од 20% од населението во Република Северна Македонија и за изменување на Законот за пензиското и инвалидското осигурување и двата во прво читање.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.