Сериозни процеси се одвиваат во правосудството, јас како претседател на владата нема да си дозволам да коментирам било какви детали за еден многу сериозен случај. Будното око на нашата јавност е сериозно насочено во случајот и очекува разрешница. Самиот судски процес треба да заврши со разрешница, да ги утврди сите вистини и да ја испорача казната за сите што се огрешиле од законот – рече премиерот во заминување Зоран Заев, коментирајќи ги најновите снимки кои излегоа на каналот Јутјуб и за заканите кои викендов му ги упати граѓанин преку порака на Фејсбук.

Моите деца и моето семејство ми се светост како што се светост за сите граѓани децата и семејството и нема да дозволам влакно да им фали од главата, како што нема да дозволам да му фали влакно од главата на секој додека јас управувам. Лично не верувам во организација на такви закани, веројатно такви закани може да се случат под дејство на алкохол, на незнам какви мотивации. Ги слушнав заканите, немав време да размислувам за заканите, но гледам мојата мајка, сопругата, децата размислуваат за нив и еве денеска можам поотворено да зборувам. Секако не верувам дека нешто ќе се реализира. Мерките на претпазливост се преземени, должен сум како родител и претседател на владата да ги преземам, на крајот на денот за мене е многу важна вистината, вистината излегува вака или онака. Најголемата вистината излегува преку судскиот процес, да се знае точно што се случило. Ова е еден од случаите каде јасно се нотира решителноста на извршната власт да се врати правната држава – рече премиерот во заминување.

Тој порача дека тоа е сериозна порака и до Европската унија дека работите во Македонија се променети без разлика дали некој е обвинител, газда на медиум или бизнисмен.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.