Група пратеници кои учествуваат во дискусиите за изнемите на Законот за Академијата за судии и обвинители бара помош од францускиот амбасадор Кристијан Тимоние да зачува институционалниот капацитет на Академијата за судии и обвинители, како и да се одржат високите објективни стандарди и принципот на еднакви шанси за секој сегашен и иден студент на оваа Академија.

Според нив, постојат основани сомневања за злоупотреба на системот од страна на генералниот секретар на Владата Драги Рашковски при конкурсите за влез во Академијата за судии и обвинители, а владата продолжува да ги турка измените на Законот за АСЈО преку злоупотреба на знамето на ЕУ, за вештачки да ја скрати постапката во Собранието.

Дополнително, за власта да може полесно да го етаблира клиентелизмот и непотизмот при изборот на идните владиноподобни судии, со законските измени предлагаат да се девалвираат објективно добиените поени, а Комисијата за приемен испит да учествува со дури 70% субјективни/дискрециони оценки за кандидатите, наспроти досегашните 10%. Доколку на ова се додадат информациите кои се појавија во јавноста дека деца и блиски роднини на високи судски и обвинителски функционери, на високи функционери во Собранието, како и на истакнати владини и партиски активисти се на “листата на привилегираните” за сигурен влез во Академијата, станува јасно дека мерит системот на оваа институција станува суштински загрозен, пишува пратеникот Антонио Милошоски, еден од потписниците на писмото упатено до Тимоние.

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.