Со првичните пописни резултати, смртноста од ковид во државата се искачи на 3.659 починати на милион жители, додека по старите податоци веб сајтот worldmeters Македонија имаше 3.218 починати на милион жители, анализира „Телма“. Со ова „пописно“ зголемување, Македонија која и онака високо котираше на табелата за смртност, поточно беше трета во светски рамки и втора во Европа, сега се искачи за уште едно место погоре и е на прво место на стариот континент откако ја престигна БиХ која има 3.267 починати на милион жители.

На светско ниво, пак, Перу останува на прво место со 5.946 починати на милион жители, а вкупно досега починале 199.485 Перуанци.

Со вкупно преброени 1.832.696 жители на пописот 2021, државата сега има и поголем процент на заразени наместо досегашните 9,23% од популацијата. Сегашните 192.478 заболени, според новите податоци од пописот, всушност се 10,5% од популацијата. Така Македонија од досегашното 44-то место во светот според веб сајтот worldmeters, се пробива на 33-тата позиција по бројот на заболени на милион жители.

Веб сајтот worldmeters, за Македонија ги користеше податоците дека во државата има 2.083.267 граѓани.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.