По два дена потрага на семејството, пријатели и полицијата, најден е младиот Јосиф од Драчево. Неговата мајка, Маја Попова, која и натаму е потресена од тоа што ѝ се случи, за „А1он“ раскажува дека полицијата успеала да го лоцира нејзиниот син.

Според неа, тој бил заведен од секта од страна на лице кое се претставувало како бездомник.

Него го најде полицијата. Ангажиравме многу луѓе, го пријавивме во полиција, ангажиравме едно чудо луѓе. Го најдовме. Дури и од неговата гимназија замоливме деца кои ни помогнаа. Тие се веќе полнолетни, со 18 години, моравме сè тоа да земеме предвид. Треба да одиме во полициска станица, каде што треба да се даде извештај – вели Попова за „А1он“.

Мајката има информации за човекот кој го завел, но полицијата ќе треба да го истражи случајот. Таа вели дека Јосиф бил врбуван, а се сомнева дека цел на ваквите луѓе се лица и деца кои се ранливи.

Имаме информација кој го завел. Човекот се вика Ангел, некој бездомник. Бил во Канада. Во тој момент веројатно се поклопиле многу работи бидејќи Јосиф талкаше од една до друга страна, можеби сакал да се пронајде себеси, па нашол, така кажано, верба во Бога. Меѓутоа, едно е тоа што ние сакаме да се подигнеме, а друго она што луѓето ќе ни го пласираат. Пред да замине тој не бил во училиште, се нашол со човекот, со тој Ангел. Тие проповедувале т.н. Божјо слово, што од една страна не изгледа лошо, но од друга страна, тие проповедуваат работи за кои велат дека се од Библијата, дека ќе дојде крајот на светот, по извесно време нешто ќе се случи, па кажувале кои работи ќе се случат и така натаму. Работата е што го наседнале и тој поверувал во сето тоа. Тука е направена грешката – раскажува Попова, вознемирена од случувањата.

Според семејството, кога бил пронајден Јосиф бил многу збунет. Седиштето на местото каде што се правеле овие активности било меѓу Центар и Карпош 4.

Сега да видиме што треба да направиме, дали ќе треба медицинска помош, дали ќе треба да воведам рехабилитација, затоа што ме вознемири моментот кога почна да прави муабет за Бога и слично. Толку беше супериорен во своите изјави што мислите дека работите ги држи во свои раце, споделуваше цела наука. Дури сега сфаќам дека толку многу ги врбуваат, шетајќи низ градов, што навистина не сум свесна какво „бомбардирање“ има од нивна страна. Мислам дека и Јосиф наседна на такво нешто, со оглед дека ги користат децата кои се кршливи, кои имаат фамилијарни проблеми. Сите ние сме во некоја транзитна состојба во која многу нешта се одразуваат на децата, особено кога нешто „чкрипи“ во бракот – додава таа.

Мајката на Јосиф упатува и порака до другите родители да бидат многу внимателни со своите деца.

Имам порака. Многу голема внимателност со децата. Да не ги распрашуваат само нив туку и сите околу нив, другар и пријатели, да споделуваат информации кои ги имаат. Сепак, сите сме во време кога трчаме да завршиме работа, да заработиме, да им дадеме нешто за нив, леб, да им купиме, во таа брканица ние го губиме нивното внимание – вели Маја Попова.

Извор: „А1Он“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.