Министерката за одбрана Славјанка Петровска денеска ги посети припадниците на Армијата на Република Македонија кои ги извршуваат своите работни задачи на јужната граница во поддршка на Министерството за внатрешни работи на караулата „Богородица“ – Гевгелија и во сместувачкиот капацитет во Богданци.

За време на посетата министерката Петровска беше брифирана за актуелната состојба на границата во однос на мигрантската криза и за ангажманот на нашите армиски припадници.

Командирот на Здружениот оперативен штаб, поручник Бојана Филиповска потенцира дека состојбата на јужната граница е стабилна и дека нашите припадници, деноноќно професионално и успешно ги извршуваат своите задачи, а при тоа имаат одлична соработка со припадниците на МВР.

Министерката Петровска им се заблагодари на припадниците на Армијата за нивната посветеност, професионалност и несебичната поддршка која ја пружаат на граѓаните секогаш кога за тоа се укажала потреба. Таа им порача дека институциите надлежни за безбедноста на државата континуирано ја следат безбедносната состојба и состојбата со мигрантите во регионот и пошироко затоа што состојбата во секој момент може да се промени а државата мора да биде подготвена да се справиме со секоја ситуација.

Со одлука на Собранието, припадниците на Армијата се распоредени на јужната граница од 2015 година, во поддршка на Граничната полиција која е дел од Министерството за внатрешни работи, со цел асистенција односно зајакнато обезбедување на границата преку спречување на нелегално и неконтролирано преминување на границата, и преку патролирање, извидување и набљудување.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.