Претседателот Стево Пендаровски смета дека сите инволвирани или споменати во врска со случајот „Рекет“ сами треба да се пријават и да дадат изјави, а не да чекаат да бидат повикани од надлежните органи.

Мислам дека секој што е споменат, треба да даде изјави, дури и ако не е повикан од надлежен орган. Едноставно, како политичари сме должни да дадеме чист одговор пред јавноста дали преку соопштение или преку изјави пред надлежен орган и да кажеме – јас со таа и таа работа немам ништо“, изјави Пендаровски при денешната посета на Велес.

Околу темпото на истрагата, не можам да се мешам. Јас не повикав што е можно побрзо и не дадов рок до кога треба да има подигнато обвинение. Можеби нема да има. Јас повикав само да престанеме со користење на годишните одмори, бидејќи тоа не беше соодветно во тој момент“, истакна Пендаровски.

Тој потсети дека на прес-конференцијата што ја одржал на 12 август кажал дека нема никаква релација со луѓето што се споменуваат и најави дека и во иднина има намера и за себеси и за луѓето од неговиот кабинет, ако на кој било начин се споменати во какви било претпоставени незаконски дејства, да излезе со соопштение или со јавна изјава и да се даде отчет пред јавноста.

Ние сме платени да дадеме отчет пред граѓаните, дури да дадеме одговор и на најнеоснованите конструкции што може да се направат. Ние сме должни да трпиме повисоко ниво на критика и јас ги повикувам и политичарите и позицијата и опозицијата и граѓаните тоа да го прават. Ние не смееме да бидеме херметични затворени во кабинетите и да чекаме да не повика официјален државен орган“, рече Пендаровски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.