Премиерот Зоран Заев, откако пред некој ден посочи дека партизаните се бореле со администрација, а не со окупатори, денеска упати телеграма со сочувство до семејството на првоборецот и носител на партизанска споменица 1941 Раде Гогов.

-Во овие моменти на семејна тага дозволете ми од мое име, и од име на Владата на Република Македонија, да Ви изразам искрено сочувство за смртта на првоборецот и носител на партизанска споменица 1941 Раде Гогов. Првоборецот на НОВ Раде Гогов, кој како млад 18 годишен партизан го обезбедуваше првото заседание на АСНОМ, останува во нашите срца и сеќавања како борец кој остави своја неизбришлива трага во македонската историја, како првоборец за нејзиното ослободување, самобитност, државност и независност, нагласи Заев.

Тој во телеграмата истакнува дека неговата посветеност кон стратешките цели на државата и кон борбата за поубаво, слободно и напредно општество, го прават неговиот животен пат судбински испреплетен со патот на нашата татковина.

-Како борец на НОБ, ќе остане запаметен по храброста и неговите преданија за македонската борба за слобода. Нека му е вечна славата, вели Заев во телеграмата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.