Министерот за внатрешни работи Оливер Спасовски денеска апелираше до опозицијата која најави протести во повеќе градови да ја почитува забраната за јавни собири, заради заштита на здравјето и спречување на ширењето на коронавирусот.

-Апелирам да се почитуваат мерките, затоа што ако има одлука да нема можност за собирање и протести тоа да не се прави пред се заради здравјето и животот на граѓаните. Ако наш висок приоритет е да ги сочуваме здравјето и животот на граѓаните тоа треба да го направиме сите. Заштитата од Ковид-19 не подразбира власт, опозиција, вера или нација, туку подразбира сите заедно во борба против овој непријател и да ја зачуваме државата народот и здравјето и животот на граѓаните, рече Спасовски.

Одговарајќи на новинарско прашање во врска со одредени закани од некои опозициски лидери, тој рече дека безбедносната состојба во земјава е стабилна, мирна без никакви основи за нарушување на јавниот ред и мир. Заканите од одредени лица од опозициските партии, потенцира Спасовски, се следат, но, тие не претставуваат никаков проблем за јавниот ред и мир.

На вчерашниот протест на ВМРО-ДПМНЕ поради ставовите искажани од премиерот Зоран Заев во интервјуто за БГНЕС беа најавени протести и блокади во неколку градови во земјава.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.