Првото судско рочиште против Нефи Усеини и неговиот брат Ибраим за нападот на Спирко Топалоски, се одложи за 26 октомври. Причина за одложувањето е непојавувањето пред судот на обвинетиот Ибраим и Топалоски.

Според одбраната, Ибраим Усеини имал проблеми со покачен крвен притисок, и денеска бил префрлен во Центарот за кардиолошки и васкуларни заболувања во Охрид, за што била приложена документација.

Од друга страна Топалоски не се појави затоа што немало кој да му ги чува децата, бидејќи неговата сопруга била работно ангажирана во градинка и не можела да најде замена.

Судијата кој го води предметот, Милчо Клишески, најави дека Топалоски ќе биде стражарно приведен доколку за следната покана не се појави во судницата.

На рочиштето присутен беше единствено Нефи Усеини.

Неговиот адвокат, Димитрија Цобоски, во изјава за медиумите после одложувањето, рече дека делото за кое се товари неговиот клиент, не е во доменот на тешки кривични дела.

Тежината на кривичното дело треба да се рангира според последиците настанати во самиот настан. Во конкретниот случај се работи за кривично дело со лесни телесни последици, така и треба да се квалификува. Квалификацијата произлегува од тоа што што делото е сторено од група, во случајот Нефи и Ибраим Усеини. Што точно се случило ќе се утврдува во доказната постапка – истакна Цобоски.

Во однос на спомнувањето на пиштолот, адвокатот Цобоски додаде дека во обвинието нема пиштол, нема огнено оружје, односно нема кривично дело „неовластено поседување оружје“.

Како што напомена Цобоски, неговиот клиент, Нефи Усеини е неосудувано лице, бидејќи поседува решение за бришење казни од претходни постапки.

Судскиот процес против браќата Усеини се води поради сомневање дека се сторители на кривично дело „насилство“ извршено врз Топалоски. Настанот се случи на 18 август годинава кога пред хотел во Охрид, Топалоски физички бил нападнат од браќата Усеини, при што според првичната изјава на оштетениот бил изваден и пиштол, а кон него и неговиот малолетен син биле упатувани закани. Подоцна тој го смени исказот и рече дека пиштол не видел.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.