На Меѓународниот Аеродром во Скопје попладнево пристигнаа 44 Авганистанци. Тие се втора група авганистански граѓани кои привремено ќе бидат згрижени во нашата земја, а се евекуираат од Авганистан откако талибанците ја презедоа власта во таа држава, соопштуваат од Влада.

Додаваат дека Авганистанците кои пристигнаа попладнево се активисти од организацијата Тиркиз моунтејн (Тurquoise Мountаin), а меѓу нив има и членови на нивните семејства. По слетувањето е предвидена стандардна процедура, поддршка од Црвениот крст, безбедносна проверка и заштита, медицинска поддршка, ПЦР тест и можност за вакцина.

Како што информираат од Владата, овие лица ќе бидат привремено сместени во Скопје додека не се обезбеди трансфер до крајна нивна дестинација. Трошоците и за оваа група ќе бидат целосно покриени од меѓународните организации.

Тиркиз моунтејн е организацијата основана во 2006 година од принцот Чарлс со хумана мисија која изминативе години имаше свои успешни активности во Авганистан. Како што информираат од Владата, оваа организација реставрираше повеќе од 150 историски објекти, третираше околу 165 илјади пациенти во клиниката во Кабул, отвори и поддржа повеќе од 50 мали бизниси во Авганистан, Мјанмар, и други активности, информираат од Влада.

Додаваат дека Македонија останува посветена на глобалната хуманитарна акција која има за цел да им помогне на граѓаните од Авганистан кои во изминатиов период работеа на подобрување на човековите права, демократијата и мирот.

Првата група од 149 Авганистанци во земјава пристигнаа на 30 август, меѓу кои и жени и деца, а сподед владата станува збор за Авганистанци што работеле за меѓународни организации и нивните семејства.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.