Зоран Заев и Рускоска-обвинителството немаат интерес да се расчисти аферата „Рекет“. Напротив, Заев и Рускоска имаат интерес случајот да се затвори на начин што ќе се избришат трагите кои водат кон главата на октоподот, стои во денешното партиско соопштение на ВМРО-ДПМНЕ.

Опозициската апртија обвинува дека тоа е причината што обвинителството шест месеци не постапило против Фросина Ременски.

Затоа таа и сега е оставена на слобода. Нема поголем доказ за соработката меѓу Заев, Рускоска и Ременски од фактот дека Фросина Ременски ќе одлучува за Законот за јавно обвинителство, Закон од кој зависи работата на Вилма Рускоска која ја гони Ременски.

Од партијата се сомневаат дека Јовче Ременски како висок функционер во УБК може директно да влијае на работата на оперативците за да излезе во интерес на својата сопруга.

Не може да не се доведе во прашање користењето на информации и потенцијалната злоупотреба на истите за влијание во истрагите на органите. Затоа тој мора да биде суспендиран од своите работни надлежности. Власта и институциите да не си играат држава, туку да го почитуваат Законот за класифицирани информации. Тој предвидува дека освен лицата кои поседуваат безбедносен сертификат од највисок степен, во оперативните проверки се проверуваат и членовите на потесното семејство. Не само што Јовче Ременски е потенцијален ризик за истрагата на случајот „Рекет“, туку Дирекцијата за класифицирани информации и Агенцијата за национална безбедност не смеат да дозволат брачен другар на обвинет во коруптивен скандал да поседува безбедносен сертификат.

Компромитирачки е фактот дека во Собранието обвинетата пратеничка на СДСМ Ременски е вклучена во работата на телата кои одлучуваат за закони од областа на безбедноста, како и за Законот за јавно обвинителство.

Институциите да не спијат туку веднаш да истражат дали Фросина Ременски преку својот сопруг злоупотребувала информации од полициските служби и дали истите биле користени во случајот „Рекет“. Да се направи проверка дали нејзиниот сопруг бил вклучен во дејствијата кои што таа ги превземала, а се поврзани со Меѓународниот сојуз и кривичното дело за кое што обвинителството ја товари. Секој што ќе постапува надвор од законот, без разлика дали му наредил Заев или друг функционер близок до Заев, ќе сноси одговорност за незаконското работење, штом ќе се врати правната држава.

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.