Началникот на Генералштабот (ГШ) на Вооружените сили (ВС) на Унгарија, генерал-потполковник Ромулус Русин-Сенди, кој се наоѓа во дводневна официјална посета на Армијата на Република Македонија, утре ќе престојува во Генералштабот на Армијата и Министерството за одбрана.

Церемонијата за пречек со воени почести ќе се одржи во 9 часот, по што генералот Сенди ќе оствари средба со својот домаќин, началникот на Генералштабот, генерал-потполковник Васко Ѓурчиновски и со министерката за одбрана Радмила Шекеринска.

Тема на официјалните разговори, покрај билатералната соработка, ќе бидат и активностите во процесот на трансформација на Армијата, нашиот придонес во мировните операции надвор од земјата и ангажманот во се уште актуелната мигрантска криза и капацитетите и можностите за изведување на вежбовни активности на армискиот полигон „Криволак“.

Началникот на ГШ на ВС на Унгарија, во текот на денот ќе биде примен и од претседателот на Република Македонија и Врховен командант на ВС, Стево Пендаровски, а ќе го посети и Баталјонот за специјални сили во касарната „Илинден“ каде ќе се запознае со дел од активностите на нашата специјална единица.

 

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.