Министерството за здравство реагира на соопштението на Конфедерацијата на синдикати во кое се тврди дека мерките кои ги предлага Комисијата за заразни болести се „присилна вакцинација“.

„Вработените кои ги опфаќаат новите мерки имаат избор да приложуваат и негативен тест еднаш неделно доколку одлучат да не се вакцинираат, а сите оние кои имаат здравствени проблеми заради кои не може да се вакцинираат, не се присилени да го направат. Истите мерки кои ги предлагаме се веќе воведени во многу земји во Европа и регионот како на пример во Словенија, Хрватска и Грција каде што одамна се на сила. Во услови кога се заканува нов силен ковид-бран, должност на Министерството и на Комисијата е да предлагаат соодветни мерки кои со сигурност ќе дадат резултати како за намалување на ширењето на вирусот, така и за подигање на процентот на имунизирано население“, соопшти Министерството за здравство.

Протести или други форми на изразување на незадоволство против мерките се демократско право, но исто така се спротивни на здравствените препораки кои доаѓаат од светските здравствени институции, наведено е во соопштението.

„Апелираме на одговорност на сите граѓани и чинители во општеството со цел заеднички да ги надминеме сите предизвици со пандемијата која, за жал, сè уште коси во светот. Бараме поддршка за мерките кои се во интерес на јавното здравје и заштита на здравствениот систем кој трпи огромен притисок пред сè од лица кои не се вакцинирани, а имаат потреба од болничко лекување“, наведува Министерството за здравство.

Конфедерацијата на синдикалните организации на Македонија (КСОМ) е против задолжителната вакцинација за вработените во јавниот и приватниот сектор. Oд таму сметаат дека неприфатливо е да се наруши слободниот избор на работниците во однос на прашањето за имунизација од ковид-19.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.