Бугарското Министерство за надворешни работи излезе со став за почитување на правата на бугарските граѓани и државјани со бугарски идентитет во Република Македонија во врска со изјавата на премиерот Зоран Заев од 3 септември, за правата на Бугарите во Македонија.

Како што јави дописникот на МИА од Софија, во документот се вели дека Софија во неколку наврати изјавила дека е свесна за проблемите со кои Бугарите се соочувале во минатото и дека за жал продолжуваат да се соочуваат до ден денес, а тоа било репресија, говор на омраза и нееднаков третман.

– Континуираната практика на овековечување на предрасудите и негативните стереотипи кон Бугарија и бугарскиот народ, вклучително и преку медиуми, учебници и споменици, како и напади врз бугарските национални симболи и спомен плочи, дополнително придонесува за создавање негативни ставови и неповолна средина за бугарските граѓани во Република Македонија, пишува во документот на бугарското Министерство за надворешни работи.

Се наведува дека Република Бугарија инсистира на јасна и недвосмислена позиција на властите во Република Македонија да преземат конкретни активности за изградба на интегрирано општество базирано на владеење на правото и заштита на човековите права. Гарантирањето на уставните права на граѓаните со бугарска определба на рамноправна основа со сите други граѓани на Република Македонија, без дискриминација, ќе им реши голем број егзистенцијални прашања. Важноста за одржување добрососедски односи, а особено доследната имплементација, со добра волја, на билатералните договори со земјите -членки на ЕУ, постојано беше нагласена од Советот на ЕУ. Имплементацијата на одредбите и духот на Договорот за пријателство, добрососедство и соработка склучен во 2017 година е од клучно значење и останува предуслов за напредок во процесот на пристапување на земјата во ЕУ.

Како заклучок, во документот се наведува дека Бугарија ќе посвети посебно внимание на сите процеси поврзани со создавање на неопходните услови за самоидентификација на граѓаните со бугарска определба.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.