Републичкиот судски совет треба да поведе постапка за нестручно работење на судијата Oгнен Ставрев, вели пратеникот Антонио Милошоски, коментирајќи ја неговата улога во случајот ТНТН.

Деновиве случајот ТНТ освен по својата содржина, стана актуелен и по писмената оставка на судијата – поротник, заради спреченост преку истек на мандат и законски навршени години. Со тоа судењето почнува од почеток и ќе трае уште две години.

Милошоски потенцира дека доколку се слушаат изјавите на странките во спорот и нивните застапници, тогаш се извлекуваат различни заклучоци за тоа кој е одговорен за ваквиот пропуст во постапката.

Но, законот за кривична постапка е прецизен и одговорноста за ваквиот суштински пропуст во судењето за предметот „ТНТ” ја лоцира кај судијата Огнен Ставрев, како претседател на судечкиот совет. Според членот 349 од ЗКП точно претседателот на судечкиот совет Ставрев имал одговорност да побара од претседателот на судот (Џолев) да определи еден или двајца судии – поротници како замена, доколку е веројатно дека главната расправа ќе трае подолго. А со толку многу докази, вештачења, бројот на обвинети и уште поголемиот број на сведоци, како и со имањето на податоците за возраста на поротничката, судијата Ставрев можел и морал да знае дека главната расправа за „ТНТ” ќе трае подолго. Затоа, повторувањето на постапката за “ТНТ” е исклучива грешка на судијата Ставрев, заради неговото лошо менаџирање и ненавременото и немарно вршење на судската функција во водењето на постапката, потенцира Милошоски.

Согласно тоа, додава Милошоски, сега на потег е Републичкиот судски совет, кој согласно членот 75 од Законот за судовите, по иницијатива од Претседателот на РСС Киро Здравев, треба да поведе постапка за нестручно/ненавремено работење на судијата Огнен Ставрев.

На таков начин судските тела самостојно ќе покажат капацитет за примена на законите кои се однесуваат на судиите и со тоа ќе ги намалат прозивките за “ветинг” кој други надворешни фактори би им го наметнувале на судиите како независна власт, порача тој.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.