Претседателот на ВМРО-ДПМНЕ, Христијан Мицкоски, на прашања за медиумите од посетата во Штип, ја коментираше новата коалиција во која влезе и Алтернатива и распределбата на директорските и министерски места. Мицкоски рече дека ова наликува на последниот чин на обидот за уништување на Македонија, во режија на Зоран Заев и СДСМ.

Ова што се случува изминативе денови претставува политичка некултура и препелкање на самиот Зоран Заев и СДСМ и обид, колку толку да го продолжат својот политички век на траење на неколку недели. Срамно е ова што се случува, срамно е што политиката се сведе на трговија како на зелен пазар и наместо да зборуваме за стратегија, за визија, да зборуваме за вредности, да зборуваме за проекти за развој, денес дебатата се сведува на тоа кој – колку министерски места добил, колку директорски места добил, колку членови во управен одбор, колку во надзорен и на крај на денот сето тоа го плаќа сиромашниот граѓанин во Македонија, рече Мицкоски.

Мицкоски продолжи и рече дека токму тоа е суштината во пристапот на Зоран Заев која е целосно погрешна и уште еднаш заклучи дека тоа всушност е последниот чин од обидот да се уништи Македонија, да се осиромаши народот и сето тоа во режија на Зоран Заев и СДСМ.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.