Министерот за правда Бојан Маричиќ од првата панел-дискусија, „Преспа форум дијалог“ кажа дека е потребно поголема регионална соработка и обединување во борбата против стереотипите, дезинформациите и корупцијата. Според Маричиќ, овие проблеми се присутни во сите земји од нашиот регион и затоа фокусот треба да биде ставен на поблиска соработка. Тој во својот говор се осврна и на улогата на невладините организации и медиумите во борбата токму против овие девијантни појави.

Улогата на медиумите е извонредно голема во кршењето на стереотипите и тие треба да бидат своевидна брана против говорот на омраза, хранењето на стереотипите и ширењето на лажните вести. Слободата на медиумите, за тие да можат соодветно да ја завршат својата важна општествена улога, е регионално прашање. Важна е улогата и на невладините организации во овие процеси. Јас доаѓам од граѓанскиот сектор и многу добро ја знам улогата на овие организации и во градењето на мостови меѓу државите во регионот. Тие можат да бидат катализатор во тешки политички процеси, кои се чести во нашиот регион, истакна Маричиќ.

Ова Маричиќ го изјави на првиот панел на Форумот насловен „Граѓанското општество и медиумите во регионот и евроинтеграцискиот процес“ на кој учествува и германскиот државен секретар за Европа Михаел Рот кој кажа дека Европската Унија никогаш не може да биде комплетна без државите од Западен Балкан.

Рот истакна дека Германија е разочарана од одлуката да не се отворат преговори со Македонија и Албанија само поради блокирањето на една држава членка. Тој во својот говор се осврна и на значењето на медиумите во градењето на модерно европско општество ослободено од предрасуди и национализам.

На панелот говореа и Иоанис Армаколас, Игор Бандович, Кристоф Бендер, Флориjан Бибер, Роберт Купер, Доминика Емини, Симонида Кацарска, Љупчо Поповски, Весела Чернева, Ѓерѓи Вурмо според кои регионот има огромен потенцијал за развој, до кој може да се стигне само преку добра регионална соработка, со помош на медиумите и граѓанскиот сектор.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.