Разговараме со сите групи и со сите пратеници и убеден сум дека не сме толку далеку од 80 пратеници, изјави на новинарско прашање за уставните измени заменик претседателот на Владата задолжен за европски прашања Бојан Маричиќ.

Мислам дека сега во оваа фаза сите истакнуваат широк круг на идеи околу уставите измени и тоа е добро, но ќе дојдеме во една фаза кога ќе мора агендата да ја насочиме на она што навистина ни е потребно за деблокирање. И г. Трајанов ќе има прилика тогаш да каже под кои услови и дали би ги поддржал уставните измени, но мислам дека освен него никој друг нема изнесено резерва во однос на поддршката кога зборуваме за владиното мнозинство. Понатаму ќе видиме, разговараме со сите групи и со сите пратеници и убеден сум дека не сме толку далеку од 80, рече Маричиќ запрашан колкава е бројката на пратеници од парламентарното мнозинство што би ги поддржала уставните измени.

Во однос на тоа дали со опозицијата се разговара на оваа тема, вицепремиерот посочи на одржаната лидерска средба чија цел, вели, беше да се отвори дијалог за тоа прашање и оти тие состаноци ќе продолжат.

Како што кажав, допрва ќе треба да допреме и со сите пратеници и до сите парламентарни групи и од опозицијата, но и од владејачкото мнозинство за да дојдеме до пакет којшто ќе биде поддржан од 80 пратеници, рече Маричиќ.

Тој изјави дека не го смета како притисок доаѓањето на многу европски функционери во Скопје изминатиот период, и оти очекува тој тренд да продолжи, а ваквото внимание од ЕУ институциите и земјите-членки цени дека е во наша полза и треба да се искористи.

Тој процес ќе продолжи и јас сум убеден дека само може да се развива. Кон крајот на овој месец ќе ни дојде и германскиот претседател во посета и тој тренд нема да застане во текот и на наредната година. Мислам дека Cеверна Македонија треба да го искористи вниманието што го има од европските лидери, од европските институции, но и од државите членки затоа што тој фокус треба да го искористиме во наша полза за да ги отклониме сите пречки, вклучувајќи ги и уставните измени и да продолжиме со преговорите и по ноември 2023 година. Тоа не е никаков притисок. Тоа е внимание кое што е во наша полза, а сепак ние треба да сме свесни дек блокадата е во наши раце и од нас зависи како ќе продолжиме натаму и дали ќе продолжиме, рече тој.

Во контекст на динамиката на скринингот истакна дека е прилично задоволен од текот на скринингот.

Досега се поминати објаснувачки скрининг за три кластери и започнат е билатерален скрининг од Кластер 1 – темелни вредности, веќе за две поглавја јавни набавки и статистика. Претстои наредната недела билатерален скрининг за Поглавје 24 и за Поглавје 23 во првата недела од месец декември со тоа ќе ја заокружиме агендата за оваа година. Секако мора да го одржуваме темпото, мора да имаме еднакво ниво на подготвеност по сите Поглавја и подготвени сме и инсистираме на тоа што повеќе прашања од ЕК да одговориме на лице место, да не оставаме на писмено подоцна и ако има и такви меѓутоа тоа да биде исклучок, вели Маричиќ.

Во однос на вклученоста на Собранието, тој нагласи дека во оваа фаза повеќе товар има Владата, но Законодавниот дом ќе треба повеќе да дејствува откако ќе ги добиеме скрининг-извештаите, односно задачите што е основ за новиот реформски план.

Јас повеќе пати упатив и јавна покана, но и во директна комуникација со Националниот совет за евроинтеграции да ги интензивираме работите, да интензивираме комуникации и да направиме заеднички план како да се туркаат европските реформи, она што е врзано со скринингот и преговорите преку Собранието. Собранието покрај тоа што ќе ги носи законите ќе може и ќе има прилика и да ги следи преговарачките позиции, да ги дискутира, да влијае на нив. Ние сме за тоа како Влада подготвени. Тоа креира една атмосфера и за уставните измени, секако, не верувам дека ќе брзаме, но имавме една лидерска средба и мислам дека ќе има серија на средби коишто треба да доведат до атмосфера во која што нема да дозволиме ние да бидеме пречка за нашиот евроинтегративен пат. Јас тоа го кажав и претходно – по првпат во историјата блокадата е во наши раце, нагласи Маричиќ.

За тоа дали се очекува притисок од Бугарија во однос на скринингот, тој вели секоја држава членка има право да учествува на билатералниот скрининг и да поставува прашања, а во однос на слободата на здружувања, рече, ние имаме добро досие, има усвоен закон во Собранието, но Министерството за правда веќе работи на нов закон со којшто ќе имаме една рамка за заштита од злоупотреба на слободата на здружување заради нарушување на јавниот поредок.

Инаку, досега во поглавјето не се спомнуваат обврските на договорите и не очекува тие да бидат споменати, бидејќи добрососедските односи и договорите што се наоѓаат таму не подлежат на процесот на скрининг.

Она што во одредени поглавја може да се отвори како тема на пример во Поглавје 23 кај што имаме прашање дискриминација, слободи и права на тој начин може да се отвори од страна на државите членки, но пак ќе кажам – тоа ние што го кажуваме тука ќе го кажеме и таму и законите и сето тоа го гледаме низ призма на сите граѓани тука и сите заедници без никого посебно да потенцираме. Така што спремни сме да објасниме се што прават нашите институции и спремни сме секаде таму каде што според европските стандарди ќе се увидат некакви слабости да ги надминеме, но нам ни е важно овој процес да не се билатерализира или дополнително да се оптоварува со билатерални прашања и мислам дека е тоа позиција на повеќе држави членки, ако не и скоро сите, рече вицепремиерот Маричиќ по вториот настан посветен на годишниот Извештај на ЕК за земјава за 2022 година „На европскиот пат: Нови реформи, нови можности”.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.