Александар Кирацовски, претседател на Комисијата за политички систем и односи меѓу заедниците на денешната средба со новинарите соопшти дека в среда на седница ќе се дебатира за Изборниот законик.

Јавна расправа, дебата или дискусија за Изборниот законик ќе има в среда, во 14 часот, а за локацијата дополнително ќе ве известиме. Ќе се дискутира дали треба да има шест или една изборна единица, дали треба да има отворени листи и еднаква родова застапеност на пратеничките листи и ќе можеме заедно пред амандманската расправа да ги согледаме сите аргументи за потребата од ова законско решение, соопшти Кирацовски.

За ставот на Талат Џафери Кирацовски појасни:

Не знам поради кои причини претседателот на Собранието Талат Џафери на некој начин спречи јавна дебата или расправа по однос на ова предлог законско решение кое е исклучително битно за развојот на деомократијата. И таквиот негов чин, иако е мој колега и почитуван, го сметам за недемократски, но мислам дека заедно ќе успееме да изнајдеме можност ова законско решение да допре до граѓаните.

Повикувајќи се на Деловникот на Собранието, рече дека ирелевантно е тоа дали ќе се нарече диксусија, дебата, расправа, важно е граѓаните да добијат сознание кое е тоа законско решение во однос на Изборниот законик кое нив најмногу ќе им одговара. Потсети дека досега по истиот начин закажани се јавни расправи за Законот за данок на личен доход, Законот за минерали суровини, Законот за заштита од пушењето и за многу други законски решенија.

Уште еднаш повтори дека ако претседателот на Собранието Џафери дозволи, дебатата ќе се одржи во Собранието, во собраниската сала „Борис Трајковски“. Ако не дозволи, ќе ја организираат во холот на Собранието, или на скалите, или некаде надвор во некоја конференциска сала, тоа, како што рече, е ирелевантно.

Одговарајќи на новинарско прашање Кирацовски рече дека на расправата или дебата ќе бидат повикани сите претседатели на политички партии или нивни претставници, особено на малите партии, сите кои директно се вклучени во изборниот процес, ДИК, НВО…

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.