Ако изборите во Република Македонија се одржат утре, ВМРО-ДПМНЕ ќе извојува убедлива победа со 6 проценти предност пред СДСМ, што е за повеќе од 4% повеќе од претходните парламентарни избори одржани во 2016 година, потврдува анкетата на ИПИС објавена на платформата Јуроп електс.

Анкетата е направена на репрезентативен примерок од 1109 испитаници во периодот од 14 до 17 септември 2019 година, односно цел месец пред добивањето, односно недобивањето датум за преговори со ЕУ. Отуука, овие резултати треба да се земат со резерва, бидејќи по 17 октомври ситуацијата драстично се менува поради разочараноста на гласачкото тело во неисполнувањето на врвниот приоритет на Владата – членството во ЕУ. Многу е веројатно новите анкети да покажат уште поголема разлика во рејтинзите на опозициската и владејачката партија.

Ако се има предвид дека испитаниците не се поделени по етничка припадност, разликата меѓу ВМРО-ДПМНЕ и СДСМ во македонскиот блок е повеќе од 10% или изразено во гласови на изборите, повеќе од 100.000 гласа во корист на опозициската партија. За поткрепа, со истите информации излезе и претседателот на ВМРО-ДПМНЕ Христијан Мицкоски пред повеќе од еден месец, кој во интервју рече дека јавното мерење на јавното мислење оди во насока на тоа дека поддршката на ВМРО-ДПМНЕ се зголемува, а поддршката на СДСМ опаѓа.

Не треба да се занемари фактот дека е значително намален бројот испитаници Албанци кои на минатите избори гласаа за СДСМ. Албанците се разочарани од неисполнетите ветувања, немањето реформи и катастрофалната економска политика што ја спроведува владата, но пред се, она што беше нивни приоритет, ветувањето за членство во ЕУ.

Јуроп електс (Europe Elects) е платформа за собирање податоци за изборни анкети од земји во Европската унија. Тимот е составен од 31 волонтер од различни политички, културни и професионални средини од Јужна и Северна Америка, Европа и Блискиот Исток. Обезбедува услуги за анализа на податоци за различни заинтересирани страни. Мрежата во моментот има скоро 60.000 следбеници на социјалните медиуми. платформата е основана во 2014 година, а нејзин претседател е Тобијас Герхард Шминк.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.