Новинарките Мери Јордановска и Искра Коровешовска поднесоа пријава во МВР против државниот службеник во Централен регистер, Емил Јакимовски, за навредување и закани по социјални мрежи, потврдија за МИА од МВР и нагласија дека ќе се постапи по пријавата.

Техничкиот министер за внатрешни работи Наќе Чулев вчера лично контактирал со Јордановска и Коровешовска кои добивале закани од Јакимовски, кој, пак веќе го добил отказното решение од Централниот регистар.

Чулев за МИА изјави дека со Јордановска и Коровешовска е договорено денеска да дојдат во СВР-Скопје, да ги пријават случаите и да ги донесат материјалните докази со цел итно процесуирање во Основното јавно обвинителство.

Тој најостро ги осудува сите манифестации на насилство, закани и навреди кон новинарите и другите претставници на медиумите.

Сакам да упатам апел дека министерот за внатрешни работи нуди целосна соработка и поддршка за сите вакви случаи на насилство со цел идна превенција на закани и други форми на насилство. Јас лично како министер им стојам на располагање на медиумските работници 24 часа. Би сакал да потенцирам дека во контакти со здруженијата на новинарите и врз основа на добиени информации од службите на МВР ќе настојувам да се расветлат и сите досегашни закани и форми на насилство врз медиумските работници кои досега не се разрешени, рече Чулев за МИА.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.