Компанијата „ИНФИНИТИ Енерџи и ИТСС Скопје“ ги отфрла сите наводи, кои пратеникот Александар Николоски и неговата партија ВМРО-ДПMНЕ, изминативе денови ги пласираат во јавноста, како што велат од компанијата, тенденциозно и неаргументирано.

Во соопштение до јавноста компанијата „ИНФИНИТИ Енерџи и ИТСС Скопје“ вели дека ги испочитува сите законски процедури и на транспарентен начин го доби тендерот за набавка на компјутери за Министерството за внатрешни работи, а кој се спроведува со американската компанија „Дел“, едно од водечките светски имиња во светот на информациската технологија.

„Ги отфрламе инсинуациите дека на овој начин можеме да влијаеме на безбедносниот систем во Македонија, бидејќи се работи за стандардна набавка на компјутерска опрема која никако не може да има влијание врз безбедносните структури во државата.

Со сензационалистичкиот пристап на пратеникот Александар Николоски, во јавноста се пласираа неточни информации, чиешто објавување со очигледна намера нанесе штета како на работењето на компанијата, така и нашите деловни партнери.

Фирмата на синот на Додик, која е на црната листа на САД, од Владата добила тендери од милион 643 илјади евра

Остро ги отфрламе и наводите дека синот на Милорад Додик, цитиран во изјавата на Николоски, е сопственик, или пак некогаш бил сопственик на Инфинити Интернејшнл Груп или на друга компанија која е дел од неа. Мнозински сопственик на ‘ИНФИНИТИ Енерџи и ИТСС Скопје‘ е Инфинити Интернејшнл Груп и има транспарентна сопственичка структура којашто во секое време може да се провери преку увид во судскиот регистар“, се вели во соопштението.

Оттаму додаваат дека е особено навредливо тврдењето дека нивната компанија и групацијата на која ѝ припаѓаме се наоѓаат на црната листа на САД, поради што ќе бидат принудени за изнесените невистини да побараат соодветна правна заштита пред надлежниот суд.

„Имајќи ги предвид овие факти, го отфрламе секој обид за политизирање на работата и резултатите на нашата компанија, кој не е ништо повеќе од нарушување на деловниот углед и репутацијата која внимателно ја градиме, за доброто на целата заедница и нашите вработени.

‘ИНФИНИТИ Енерџи и ИТСС Скопје‘ вработува 30 експерти и инженери кои со својата квалитетна работа и знаење на клиентите им ги нудат најсовремените деловни решенија. Благодарение на тоа, нашата компанија е препознаена од странските партнери како доверлив и квалитетен соработник кој зад себе има бројни успешно реализирани проекти. За квалитетот говори и податокот дека ‘ИНФИНИТИ Енерџи и ИТСС Скопје‘ аплицираше и за членство во Американската стопанска комора, чијашто македонска филијала брои повеќе од 130 најуспешни деловни субјекти“, се додава во соопштението.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.