Лидерот на ВМРО-ДПМНЕ Христијан Мицкоски на следната седница на Извршниот комитет ќе предложи разрешување на ексамбасадорот Томислав Димитровски, кој е дел од неговиот кабинет, поради настанот неделава кога Димитровски репетирал пушка кон сосед.

Мицкоски денеска рече дека не бил тука кога се случил тој настан, но ги следел случувањата во медиумите.

Томислав не е мој стратешки соработник, тој е дел од кабинетот, од луѓето во мојот кабинет и одговорен е за релации со земјите од Балканот. Слушнав за настанот, разговарав и со него и на следната седница на Извршниот комитет ќе предложам негово разрешување, бидејќи таков тип однесување, веќе во неколку наврати кажав, е недозволено по која било цена – рече Мицкоски.

Лидерот на ВМРО-ДПМНЕ вели дека правдата не треба ние да ја земаме во свои раце, бидејќи има органи во државата кои што треба да го направат тоа.

Ако некој се чувствува нападнат, навреден комотно може да се јави и да побара заштита од Министерството за внатрешни работи. Така што, и покрај тоа што станува за човек кој што го познавам од детството, човек кој што навистина има квалитети, и човечки но и дипломатски, но, ова кое што се случило е без никакво оправдување и веќе на следната седница на Извршниот комитет ќе побарам негово разрешување од таму каде што се наоѓа во моментов – додаде Мицкоски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.