Со Преспанскиот договор се отвори вратата и затоа има бугарски политичари кои ни кажуваат дека тоа треба да го направиме и со Бугарија и дека додека не се направи нема да одиме понатаму, изјави Илија Димовски од ВМРО-ДПМНЕ, за „Само вистина“ на Канал 5 кој потенцираше дека информациите кои случајно или не излегоа дека Бојко Борисов бил длабоко вклучен во преговорите за Преспанскиот договор, беа фрапантни и страшни.

Димовски истакна дека проблемот е што со Преспанскиот договор се дозволи да се редефинира македонскиот идентитет и нас ни е забрането да се повикуваме на македонското наследство кое е вонвременско и цивилизациско.

– Нема во Европа меѓудржавен договор каде две држави дефинираат доколку јас кажам дека сум Македонец, што се подразбира под тоа, ако сум на оваа страна на границата и на другата страна на границата. Тоа е иронијата на нашето прифаќање за редефинирање на идентитет. Седумосминскиот такт е настанат во Егејска Македонија, најубавите македонски песни се таму настанати, сржта на конципирање на македонски јазик ја дава човек од Егејска Македонија, рече Димовски.

Тој нагласи дека тоа што бара и Бугарија редефинирање како што има во Преспанскиот договор во принцип крајната цел и на Грција и на Бугарија е деформирање и деградирање на македонскиот етнички, национален и јазичен идентитет.

– Тие двете може и признаваат македонски политички идентитет, дека има политичка формирана нација, но не признаваат културолошка дефиниција на различна нација, изјави Димовски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.