Друштвото на писателите на Македонија порача дека јазикот е еден и единствен и македонските писатели создаваат токму на тој јазик.

„Друштвото на писателите на Македонија е еснафска, тоест писателска асоцијација, која иако не се занимава и нема да се занимава со политика, секако дека се занимава и ќе се занимава со културна политика.

Наша основна алатка е јазикот и тој за нас, како што со право и убаво истакнуваше и нашиот претходник, учител и родоначалник Блаже Конески – е нашата татковина!

Ние сме Македонци, наш мајчин и татков јазик е македонскиот и ние нема потреба никому да докажуваме дека сме Македонци и дека нашиот јазик е македонскиот.

Македонскиот јазик има дијалекти, но нашиот македонски јазик не е никаков и ничиј дијалект.

И во иднина, како и досега, ние сите – членовите на Друштвото на писателите на Македонија, ќе создаваме литературно творештво и ќе се трудиме тоа да биде со високи естетски и културлошки вредности.

Македонскиот писател и македонската книга се и ќе бидат и во иднина во центарот на вниманието на активностите, заложбите и проектите на Друштвото на писателите на Македонија.

Притоа, посебно треба да се залагаме за читањето на македонските автори и дела, зашто непрочитаните книги исто како и да не се објавени.

Македонските писатели се единствени во грижата и одбраната на македонскиот јазик и македонското книжевно творештво, кое се создава во државава, но и во на Балканот, Европа и светот.

Македонскиот јазик е еден и единствен и македонските писатели создаваат токму на тој јазик. Тоа е јазикот на нашите татковци и мајки, предци и наследници, а нашите литературни дела се значајни и вредни – токму затоа што се создадени на тој наш, роден, изворен, матичен и единствен јазик.

Нашите творби и дела се траен влог, сведоштво и доказ за минатото, сегашноста и иднината.

– Христо Петрески, претседател на Друштвото на писателите на Македонија“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.