Mинистерот за транспорт и врски Благој Бочварски, изјави дека има институции што работат и истражуваат за одговорноста за автобуската несреќа, кои на крај ќе дадат одговор каде бил пропустот и согласно тоа секој ќе си понесе одговорност.

На новинарско прашање за одговорност на ресорот што го предводи за несреќата во која загинаа 45 патници, а седум беа повредени, Бочварски изјави дека во рамки на нивното делување издавањето на лиценците е целосно непречено до овој момент, лиценци се издавани за компани кои побарале да вршат таква дејност, како и изводи од лиценци за сите кои побарале да добијат таков документ за своите возила за да патуваат и да вршат одредена дејност.

Ги поверивме двајцата возачи кои го возеле автобусот, а кога ќе добиеме информација од надлежен орган или институција, од Обвинителството или од Министерството за внатрешни работи, кои се другите возачи кои поминувале, веднаш ќе ги провериме во базата на податоците.

Веќе ги дадовме сите документи во Обвинителството кои ги има нашата база на податоци, а се однесуваат за ова правно лице. Стоиме на располагање на истрагата и не би сакал Министерството да се претвори во истражен орган и да лицитираме со секакви информации. Важно е истрагата да тече согласно процедурите и тоа што ќе го каже Обвинителството, а ние да бидеме тука поддршка и да ги даваме сите потребни документи и информации. Сметам дека во целиот период доста брзо ја информиравме јавноста. Се она што го имавме како информација од нашите бази на податоци ја дадовме до јавноста – наведе Бочварски.

Тој информираше и дека повторно е воспоставено полагањето за сертификати за возачите.

Тоа беше единствена јавна набавка во Генералниот секретаријат на Владата која се спроведуваше не само за транспорт и врски за полагање на возачи, туку и за полагање за лиценци, за градежно земјиште, судии и обвинители под правда, за труд и социјала, за сите институции што имаат допир со некакво електронско полагање. Тој процес го водеше Генералниот секретаријат, завршен е и возачите од четвртокот навака полагаат за да ги обноват свите сертификати – изјави Бочварски, пред состанокот на Опсерваторијата за безбедност на патиштата на Западен Балкан.

Министерството за транспорт и врски по автобуската несреќа што се случи на 23-ти минатиот месец на автопатот „Струма“ во Бугарија, ја одзеде лиценцата за работа на „Беса Транс БТБ”, откако беше утврдено дека превозникот за автобусот немал извод од лиценца за вршење на меѓународен слободен превоз за патници, ниту пак за друг вид јавен превоз на патници.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.