Затворањето на фирмата не бил единствениот удар на институциите што на своја кожа ја почувствувал Марјан Бојковски, сопственикот на „Гео фарм“, кој пријавил дека луѓе од Агенција за лекови му бараат мито за да му дадат дозвола за интервентен увоз, пишува Алфа во продолжението на аферата „Вирус“.

Дузина кривични дела му ставиле на товар и од МВР, па во март 2018 му пишуваат пријава за „злоупотреба на службена положба и овластување“, „производство и пуштање во промет штетни средства за лекување“, „даночно затајување“ и „фалсификување исправа“. Бојковски не знае до каде е постапката со оваа пријава оти ниту го повикале во полиција, ниту бил на распит во обвинителство иако оттогаш има поминато година и пол.

– Дали тоа беше очекувано?
– Да. Кривичната пријава беше по неколку основи, а за еден ист случај. Имаше неколку нејаснотии, зашто данокот на ДДВ се пријавува до 25-ти, во книговодство отишле на 10-ти и барале документи… дека јас не сум ги пријавил во книговодство и не се книжени, па така тие по сите основи максимално, за да ме омаловажат, да ме заплашат, со  какви било други уцени за да престанам да барам отчет за поднесената пријава – објаснува Марјан Бојковски, сопственик на Гео фарм.

– А има некаов исход по таа кривична пријава? Бевте на распит, се води некаква постапка во Суд против вас?

– Не, во Обвинителство не сум бил. Дојдоа само вешти лица по економски вештачења, ги собраа сите документи и се чудеа по кој основ ми поднеле кривична пријава – додава тој.

„Гео фарм“ е затворена скоро две години, инспектори од Агенцијата ја затвориле веќе следниот ден откако во економски криминал во МВР пријавил дека му бараат мито од Агенција за лекови во износ на околу 48.000 евра, за што Бојковски се сомнева дека некој дошепнал оти митаџиите ги пријавил во полиција.

– Што е потребно за да пријавите мито?

– Треба повеќе работи, две се најбитни. Прво храброст, а второ поддршка. Храброста која ќе ти ја кажат цената која треба да ја исплатиш, се собира, а поддршката и кога ќе ти ја дадат, може да те извисат, вели Бојковски.

За затворената фирма за која тврди дека функционирала законски води постапка пред Управен суд. За митото се води постапка во Обвинителството за организиран криминал, но не се надева дека ќе има правна разрешница во негова корист.


Извор: Алфа

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.