Започнува тридневниот книжевен фестивал „Друга приказна“ кој во Скопје ќе претстави околу 40 гости од регионот и од земјата.

Фестивалот во 18 часот во Сули ан ќе го отвори белградскиот трансдисциплинарен уметник Урош Крчадинац со претставување на два свои сјајни проекти: изложбата „Бантустански мапи“ и предавањето „Дигитална поетика“.

Централниот дел од вечерта ќе биде настанот посветен на угледната писателка Дубравка Угрешиќ, која е и лауретка на овогодишното издание на „Друга приказна“. Во видео-разговор кој ќе го води Румена Бужаровска, таа ќе зборува за своето творештво и општествен ангажман. За вонредните остварувања на Угрешиќ во експерименталната проза свои излагања ќе имаат и Гоце Смилевски (писател), Мерима Омерагиќ (книжевна теоретичарка), Ирена Јовановиќ (книжевна критичарка).

Воедно, како што соопшти тимот на Фестивалот, ќе бидат промовирани две нови македонски изданија на Угрешиќ – нејзината најнова книга „Нарилник за вештерки“ и нејзиниот роман, „Штефица Цвек во челустите на животот“. Книгите се во коиздание на Темплум, Контрапункт и МАМА Загреб. Првата фестивалска вечер ќе биде затворена со мал концерт на Димитра.

Под слоганот „Нова писменост“ фестивалот ќе ги истражува експерименталните образовни практики во наставата по книжевност, критичката и демократска училница, создавањето на книжевните канони.

Фестивалот „Друга приказна“ е поддржан од ТРАДУКИ и од Министерството за култура.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.