На 11 oктомври (недела), со почеток од 20 часот во МКЦ (сала 25 мај) ќе се одржи светска премиера на новата театарска претстава „Кожурец“ во продукција на независното здружение Артопија.

Работена според вистинска приказна, претставата ‘Кожурец’ го отвара просторот на комплексните односи помеѓу премолчувањето и прозборувањето, барајќи го во театарскиот контекст јазикот да прозбори за внатрешните и надворешни механизми на сексуалната злоупотреба на деца. Претставата претставува своевиден емотивен пејсаж на една траума, преиспитување на репрезентацијата во театарот, збир на сцени, слики и песни, добиени како материјал од истражувачкиот процес, велат од Артопија.

„Кожурец“ е работена по текст и драматургија на Билјана Радиноска и Верица Недеска.

Во претставата играат: Душица Настова, Кристина Леловац, Симона Спировска- Костовска и Наташа Петровиќ.

Билетите по цена од 300 денари се достапни на билетарница во МКЦ и онлајн, преку bileti.mkc.mk. Настанот е организиран согласно протоколите за организирање настани во затворен простор. Бројот на посетители е намален, носењето маски е задолжително за време на целиот настан, задолжително е седење на позицијата означена на билетот.

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.