Првите три концерти во новава година го доведоа нашиот прославен пијанист од светски глас Симон Трпчески во Соединетите американски држави каде што во регионот на Њу Џерси настапи со Њу Џерси Симфони и прославената диригентка Шиjан Жанг. Ова е нова соработка на нашата изведувачка ѕвезда со една од водечките дами зад пултот во светот, а која во моментов е шеф-диригент на овој оркестар од Њу Џерси. Токму на првиот настап на оваа позиција Жанг диригираше со Трпчески како солист, а зад нив е и одличната серија концерти на овој тандем во родната земја на диригентката, Кина.

Навистина имаме одлична соработка и ова беше вистинско продолжување на тоа убаво искуство. Публиката повторно не’ награди со овации за изведбите на Концертот број 2 од Лист“ – вели Трпчески за Македонското радио.

Тој најави изобилство атрактивни настапи и во продолжение на сезоната.

Со нова сила и нови надежи во новата декада (се смее – наша заб.), многу и’ се радувам на серијата рецитали што ќе ги отсвирам во Европа: во Словенија, Ирска во Даблин, во „Барбикан Центарот“ во Лондон, потоа во Сан Хуан во Пуерто Рико, па во Хјустон, а тука се настапите со оркестри во Шпанија, во Загреб, Цирих, повторно низ Велика Британија,…  Особено задоволство ми претставуваат премиерните азиски концерти на проектот „Македонисимо“ со 3 изведби во рамките на Фестивалот во Пјонг Џанг во Јужна Кореја, како нова шанса да се претстави македонската музика на далечниот континент, низ тоа што од длабоките музички корени на македонската култура го изнедривме заедно со композиторот Панде Шахов. Верувам дека оваа ќе биде уште една исклучителна година за овој проект. Едноставно, со нови сили – напред“-завршува Трпчески.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.