Со концептот на спојување на актери од пет различни држави, односно од Босна и Херцеговина, Македонија, Франција, Мексико и Турција, режисерката Теа Беговска го претставува видео проектот „Револуција во живо“, чија онлајн премиера ќе се одржи за 30 септември.

За Беговска, „Револуција во живо“ требало да биде своевидно продолжување на нејзиниот претходна претстава „Контрола“, која се одржуваше во автобус.

Идејната комплексност на овој проект бараше голема финансиска поддршка, бидејќи во проектот беше замислено да учествуваат само невработени артисти, а и самата организација бара сериозна финансиска поддршка која ја немаме. Не бев сигурна како и во која форма ќе го реализирам проектот. Ситуацијата со карантинот ме наведе да размислувам во друг правец, а сепак суштината некако да се задржи. Решив да исконтактирам мои блиски пријатели, актери ширум светот. Ги одбрав темите, а изборот за мене беше навистина тежок. Направив спој на актери кои сите сум ги запознала на различен начин, а нивната работа добро ја познавам, и за мене беше многу интересно што сите имаат различен актерски сензибилитет и пред се’ се многу сериозни и успешни актери. Тие меѓу себе не се познаваат, со сите работев индивидуално давајќи им една тема. Нивната задача беше на својата тема да направат видео со времетраење од пет минути. Ова беше голем предизвик во толку кратко време да се сублимираат толку сериозни теми како: љубов, верба, надеж, храброст и вистина, нагласува Беговска.

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.