Објавата за аудиција за нова претстава во штипскиот театар ја разбранува штипската јавност.

Реагираше ОК ВМРО-ДПМНЕ од Штип кои сметаат дека објавената аудиција за претстава на НУЦК „Ацо Шопов“ е претходно „режирана“ од директорот, Горан Трајков, и тој има информација дека истата ќе се работи.

Директорите ли си ги бираат проектите, зад завесата, министри ли се?, прашаа на прес
конференција од ОК на ВМРО ДПМНЕ Штип.

Во текот на вчерашниот ден на ФБ профилот на Центарот за култура во Штип е објавен повик за аудиција на претставата „Амбасадор“. Информирани сме дека тоа е предлог програма за проект од национален интерес за 2022 година. Затоа го повикуваме директорот на Центарот за култура да каже од каде му е информацијата дека оваа претстава ќе се работи, кога програмата за одобрени проекти од национален интерес за 2022 година сѐ уште не е објавена од Министерството за култура, реагираа од ОК на ВМРО ДПМНЕ Штип.

Директорот, Горан Трајков рече дека нема да навлегува во партиски препукувања. Претставата и да се добие и да не, сепак ќе се работи, одговори Трајков на прозивката од ВМРО-ДПМНЕ. Порача да не му се мешаат во работата.

Јас нема да навлегувам во партиски препукувања. Она што можам да го кажам е дека културата не е повеќе партиска, туку им припаѓа на сите граѓани. Од она што го слушнав од нивната прес конференција и прашањата што ги поставија пред граѓаните, должен сум да им одговорам. Ние според програмата имаме пет театарски проекти, за секој проект ќе се одвива аудиција независно дали проектот е добиен или не. Толку имам да кажам и ќе ги замолам да не ми се мешаат во работата на националната установа, одговори директорот, Горан Трајков.

 

Во објавеното соопштение на Фејсбук на театарот објавен е повик за аудиција за претставата „Амбасадор“ од Славомир Мрожек во режија на Андреј Цветановски. Аудицијата е закажана за 3 февруари, во 11 часот, во штипскиот театар.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.