Фестивалот на креативен документарен филм „МакеДокс“, што ќе се одржи од 18 до 25 август во Скопје, објави отворен повик за учество на работилница за развој на идеи со Туе Стен Милер, консултант за документарни филмови и филмски критичар од Данска, како и отворен повик за учество на МакеКоПроДокс форум 2022 за продуценти/автори со долгометражни креативни документарни проекти.

Фокусот на тринаесеттото издание на „МакеДокс“ е ставен на развој на идеи.

Отворениот повик за работилницата со Туе Стен Милер е наменет за режисери и продуценти со кратки или долгометражни креативни документарни проекти во развој што се продуцирани или копродуцирани во Грција, Албанија, Бугарија, Македонија, Србија, Косово, Црна Гора, Хрватска, Босна и Херцеговина, Словенија, Романија и Турција.

Работилницата ќе трае три дена и ќе содржи групна сесија и мастерклас (20 август), индивидуални сесии (21 август) и групна сесија и презентација на проектите (22 август). Сите сесии од работилницата ќе се одржат во живо во Скопје, на англиски јазик. Работилницата е бесплатна. Учесниците треба сами да си ги покријат трошоците за пат и сместување.

Пријавата за учество се пополнува преку формулар објавен на веб-сајтот на „МакеДокс“ (http://makedox.mk/mk/), а рокот за пријава е до 15 јули 2022.

Како учесници на работилницата ќе бидат избрани шест проекти во развој.

Задоволство ми е да се запознаам со режисерите на проектите во развој. Можеби сте ја напишале вашата идеја, можеби имате тритмент, можеби (сметам дека ова е најважно) имате некаков снимен материјал кој ќе го покажете. Клучно е да бидете отворени за фидбек од мене и од колегите. Се надевам дека по работилницата ќе си заминете со она што јас го велам „креативна конфузија и сомнеж“ – истакнува Туе Стен Милер во однос на целта на работилницата.

Туе Стен Милер работел со документарни филмови повеќе од 20 години со Данскиот филмски одбор, како офицер за печат, фестивалски претставник и филмски консултант/комесар. Коосновач е на Балтикум Филм и ТВ Фестивал, Филмконтакт Норд, Documentary of the EU and EDN (Европската документарна мрежа).

Отворениот повик за проекти на МакеКоПроДокс форум 2022 е наменет за продуценти/автори со долгометражни креативни документарни проекти.

Форумот има за цел да развие стратешки план за зајакнување на копродукциите на документарниот филм помеѓу земјите од Балканот. На форумот ќе присуствуваат претставници од 12 регионални филмски агенции, документарни филмски професионалци и 10 проекти во различна фаза на продукција. Четвртото издание на МакеКоПроДокс форумот ќе се реализира во хибридна форма на 22 и 23 август.

За учество на форумот може да аплицираат продуценти/автори на документарни филмови со аудиовизуелни проекти во фаза на продукција или постпродукција од Македонија, Србија, Хрватска, Словенија, Црна Гора, Босна и Херцеговина, Албанија, Бугарија, Грција, Косово, Романија и Турција.

Пријавата за учество се пополнува преку формулар објавен на веб-сајтот на „МакеДокс“ (http://makedox.mk/mk/), а рокот за пријава е до 15 јули 2022.

Менторскиот дел за проектите се состои од работилница за пичинг со Бриџид O’Шеа, основач на Документарната асоцијација на Европа (онлајн, пред форумот), како и пичинг сесии и еден-на-еден состаноци (22-23 август).

Изборот на доставените проекти ќе го изврши комисија за проценка, земајќи ги предвид критериумите за подобност. Резултатите ќе бидат објавени преку е-пошта и на веб-сајтот на „МакеДокс“ не подоцна од 1-ви август.

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.