Во Солун во среда (17 јули) беше отворена изложбата “Се што ни е заедничко”. Публиката воодушевена, тимот на МСУ задоволен.

“Сè што ни е заедничко” е основното мото во делата на 14 уметници од Југоисточна Европа во рамки на изложбата организирана од Музејот на современата уметност – Скопје, која се отвори  во МоМУС – експериментален центар за уметност во Солун.
Изложбата ја испитува несигурноста во различните социјални, политички и културни контексти поврзани со ранливоста и егзистенцијалната непредвидливост во земјите од Југоисточна Европа.
Видео, сликарство, фотографија и инсталации се медиумите кои се користат за да се подигне свеста за општата опасност и да нѐ натера да го доведеме во прашање начинот на кој ја доживуваме нашата актуелна ситуација и да нè натера да размислуваме како нашите индивидуални визии, одговорности и обврски можат да бидат социјално споделени и да служат на колективни цели.

Куратори на изложбата се Мира Гаќина и Јованка Попова од Музејот на современата уметност – Скопје.

Во изложбата се претставени делата на уметниците Ана Адамовиќ (Србија), Лучезар Бојаџиев (Бугарија), Флака Халити и Албан Муја (Косово), Ибро Хасановиќ (Босна и Херцеговина), Ахмет Огут (Турција), Мариа Пападимитриу и Антонис Питас (Грција), Рената Полјак (Хрватска), Анри Сала (Албанија / Франција), Велимир Жерновски, Христина Иваноска, Ѓорѓе Јовановиќ и Јане Чаловски (Северна Македонија).

Изложбата “Сè што ни е заедничко” е соработка помеѓу двата музеи како дел од пошироката заедничка програма на МСУ Скопје со институции и музеи од регионот, Европа и пошироко. Музејот на современа уметност во Скопје на крајот од септември 2019 година ќе биде домаќин на изложба на дела од колекцијата од Музејот на современата уметност МоМУС од Солун.

Изложбата ќе биде отворена за јавноста до 15 септември 2019.

„Се што ни е заедничко“ го освои Солун! 💫 Сакаме да упатиме голема благодарност до целиот тим кој стоеше позади овој заеднички подвиг. Со многубројната публика која ја заинтригира “Се што ни е заедничко”, останавме до доцна во ноќта. Прашуваа за почетоците на оваа наша комуникација, за кураторите, за делата. Посакаа да дојдат и да го посетат нашиот Музеј. Ти благодариме од се срце MOMus на оваа несебична поддршка и на топлото добредојде! ❤️

Тимот на МСУ 🌟, напишаа на Фејсбук.

фото: Фејсбук

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.