Mинистерката за култура Ирена Стефоска најдоцна до следната недела ќе закаже состанок со градоначалникот на Охрид, Кирил Пецаков за да разговараат за заедничките чекори во врска со заштитата на Охридскиот регион.
Таа на денешната прес-конференција одговарајќи на новинарско прашање посочи дека институциите и на централно и на локално ниво имаат своја одговорност и мора сите заедно да работат за да се исполнат обврските пред УНЕСКО.

Секоја од институциите, било на централно, било на локално ниво има своја одговорност, и ние мора заедно да работиме за да ги исполниме обврските, за кои сами сме предложиле пред УНЕСКО дека ќе ги исполниме, за да останеме на престижната листа на УНЕСКО. Од тие причини, Центарот за светско наследство УНЕСКО и Комитетот на членки ни дозволија уште две години, рече Стефоска.

Таа додаде дека во моментов заедно работат и со Албанија на стратешкиот план и конкретните чекори за заштитата на регионот, бидејќи како што посочи, заедно се обврзани да го заштитат.

Во однос на концесиите и плажите, Стефоска дополни дека во моментов се работи на Урбаниот план за крајбрежјето во Охрид.

Тој план зависи и од планот за управување со Охридскиот регион. Тука ќе бидат ставени и условите за користење на крајбрежјето, a потоа кога ова ќе заврши ќе може да се зборува за дали, кога и какви видови на концесии ќе се даваат. Се мора да е онака како што е пропишано. Никој не вели туризмот во Охрид да застане, додаде министерката Стефоска.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.