На 9 октомври, во 20 часот, „Белградската филхармонија“ ќе гостува во Скопје. Под диригентската палка на Габриел Фелц (Германија) ќе се изведува Густав Малер: Симфонија бр.6.

 

 

Белградска филхармонија е основана во 1923 година. Денес се позиционира како најдобар оркестар во регионот и ансамбл што претставува освежување на меѓународната концертна сцена. Според светските медиуми, „Белградската филхармонија“ е култен српски оркестар, еден од водечките европски оркестри, оркестар што гледа само напред и ансамбл што со себе носи голема доза наследство и гордост.

Специфичниот имиџ, како резултат на инвентивните уметнички концепти и креативниот маркетинг, влијаеше на препознатливоста на оркестарот. На тој начин, „Белградската филхармонија“ набрзо привлече многу познати имиња од класичната музика, кои ја дадоа својата поддршка за нејзиниот понатамошен развој. Меѓу нив особено се издвојува повеќедецениското пријателство со Зубин Мехта, кој редовно одржува добротворни концерти со оркестарот. „Белградската филхармонија“ е прв оркестар во регионот, но и пошироко што ги започнува своите концертни сезони со комплетно распродадени билети – информираат од Филхармонијата.
Шеф-диригент на „Белградската филхармонија“ од сезоната 2017/2018 година е Габриел Фелц, а главен гостин-диригент е Даниел Рајскин. Во последните неколку години, оркестарот имаше забележливи меѓународни турнеи и гостувања во Италија, Германија, Австрија, Швајцарија, Шведска, Франција, Словенија, Хрватска, Оман… Најважниот интернационален ангажман во новата историја на овој оркестар е првата турнеја во САД, која опфати настапи во Чикаго, Кливленд, Вашингтон и во њујоршкиот „Карнеги хол“, во октомври 2014 година. Од поновите меѓународни успеси се издвојува гостувањето во Москва, во престижната сала „Чајковски“, во септември 2016 година, како и двата многу успешни настапи во „Музикферајн“ во Грац, во 2018 година.

„Белградската филхармонија“, во 2017 година, започна традиција на концерти на отворено, кои бележат историски успех и се едни од најголемите од областа на класичната музика на Балканот. Повеќе од 30 илјади луѓе присуствуваа на првиот концерт, кој го водеше шеф-диригентот Габриел Фелц, а како специјален гостин настапи и познатиот Зубин Мехта. За квалитетот на работата на оркестарот значително придонесува и фондацијата на Зубин Мехта и „Белградската филхармонија“ со своите стратегиски партнери. Најважни цели на оркестарот во рамките на петгодишното планирање на активностите и развојот се позиционирање на меѓународната музичка сцена и промоција на оркестарот на другите континенти – додаваат од Филхармонијата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.