Издавачката куќа „Антолог“ го најавува првиот е-саем на книга кај нас, кој започнува денеска, а ќе биде активен на сајтот antolog.mk. Во овој период кога изолацијата на сите може да ни падне многу тешко, а зачувувањето на сопственото и на колективното здравје е врвен приоритет, и кога традиционалниот скопски саем на книгата што се одржува секоја пролет мораше да биде откажан, „Антолог“ ги нуди сите свои наслови (над 300) на попуст до дури 75 проценти. Понудата важи само за онлајн-нарачки преку сајтот на „Антолог“ и сите нарачани книги на купувачите ќе им бидат доставени на домашна адреса.

А како што прилега на секој саем на книга, така и во овој ќе бидат понудени и многу други активности:

· карантински муабети

· видеорецензии

· нови книги по специјални намалени цени како дел од пакетите

· за оние што не знаат што да си одберат – предлози од тимот на „Антолог“

· книжевно караоке

· онлајн-промоции

· предизвици и наградувања

· работилници за деца

· и уште многу други активности и изненадувања.

Ова е идеално време за читање бидејќи единствено книгата (во овие услови) може да нè однесе во возбудлива авантура на непозната дестинација. Читањето е одличен начин полесно да се поднесе времето поминато во изолација и затоа идејата на овој саем е да ги направиме книгите што подостапни за сите – по намалени цени, и тоа од удобноста и сигурноста на своите домови, велат од „Антолог“.

Деновиве во издание на „Антолог“ излезе и романот „Ана“ од италијанскиот писател Николо Аманити, во кој главниот лик Ана, нејзиниот брат и други деца шетаат низ Сицилија, јадат слатки и конзервирана храна, борејќи се да преживеат. Храната и водата стануваат луксуз. Пожари беснеат низ целата земја. Дистопија. Пред четири години опасен вирус од Брисел ја заразил целата планета и го убил целото возрасно население! Останале само деца. Организирани како детски орди, изгубените и оставени мали жители изгледаат како да ја започнуваат цивилизацијата од нула.

Поминувајќи низ низа авантури и опасности, спознавајќи ги љубовта и пријателството, Ана расте и созрева. Пред да умре мајка им, ги предупредува дека, кога ќе достигнат одредена зрелост, вирусот ќе ги убие и нив. Но им кажува и дека некој, некаде, ќе има лек!

Во овој извонреден дистописки роман, Аманити фрла остра критика на корпоративниот глобализам што владее со светот и го потсетува човештвото дека наскоро ќе исчезне ако се остави на ова и не се спротивстави. Пораките што ги пренесува Аманити преку оваа книга се и повеќе од добредојдени во ова време кога се чини дека стварноста почнува да ги остварува предупредувањата од фикцијата.

Николо Аманити (роден 1966) е еден од најпознатите италијански писатели. Студирал биологија. Автор е на неколку романи и збирки раскази. Добитник е на највисоките книжевни награди во Италија – „Вијареџо“ и „Стрега“. Голем дел од неговите книги се филмувани од режисери како Габриеле Салваторес и Бернардо Бертолучи. Во 2014 година и Аманити се испробува како филмски режисер.

Македонското издание на книгата е преведено од Калина Јанева, графички уредено од Марко Трпески, а финансиски поддржано од програмата Креативна Европа на Европската Унија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.