Издавачката куќа „Антолог“ од Скопје го објави романот „Лорд Морд“ на чешкиот писател Милош Урбан, авторот на бестселерот „Седумцкрвие“. Станува збор за готски трилер проткаен со булгаковски елементи на фантастика и гротеска. Преводот на македонски е на Игор Станојоски.

При крајот на 19 век, во Прага пламти конфликтот меѓу Чесите и Германците, се модернизира еврејскиот дел од градот, глодан од глувци, туберкулоза и други епидемии. На грофот Арцо, наречен Лорд Морд, му пречи што омилениот дел од метрополата му исчезнува пред очи и решава да спаси барем еден објект на тој начин што ќе го купи и ќе одбие да се исели. Прашката администрација му испраќа свои луѓе, првин со добро, а потоа и со лошо. Во меѓувреме почнуваат да се случуваат убиства на проститутки. Некои луѓето сметаат дека ноќе шета еврејското чудовиште, монструмот без лице, наречен Мевце, или Клајнфлајш. Други сметаат дека поврзаноста меѓу злосторствата е нешто што треба дополнително да се истражува.

Милош Урбан (1967) се смета за еден од најзначајните и најчитани чешки прозаисти. Дел од детството поминал во чехословачката амбасада во Лондон. По дипломирањето на Катедрата за англистика и нордистика во Прага, стажирал на Оксфорд, а од 1992 година работи како уредник во неколку издавачки куќи. Пишува хорор-приказни и е познат како темниот витез на чешката книжевност. Книгата е објавена со поддршка на програмата „Креативна Европа“ на ЕУ.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.