Од денеска почнува етапната исплата на јунските пензии, кои продолжуваат да се исплатуваат предвремено.

Како што информира Министерството за труд и социјална политика, подигнувањето на пензиите преку филијалите и експозитурите на банките за пензионерите кои не користат картички ќе се реализира во четири групи, според висината на пензијата.

Исплатата на пензиите до 11.000 денари ќе се врши денеска, а утре за пензиите од 11.001 до 14.000 денари. В четврток ќе се врши исплата на пензиите од 14.001 до 18.000 денари, а в петок ќе се реализира исплата на пензии над 18.001 денари.

Пензионерите кои користат платежна картичка, поврзана со сметката на која се префрлува пензијата, со парите можат да располагаат од денеска, 28 јуни 2022 година. Тие можат да ја подигнат пензијата на банкомат, да ги користат средствата за плаќање во трговската мрежа или за електронски плаќања.

Апелираме до пензионерите да се придржуваат до распоредот за исплати, затоа што етапната исплата е направена со цел да се намали метежот пред и во банките со цел заштита на личното и јавното здравје – се наведува во соопштението од МТСП.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.