Платите во македонската економија се четири пати пониски од платите во Словенија затоа што македонската економија е четири пати помалку продуктивна од словенската. ВМРО-ДПМНЕ смета дека платите можат да растат само преку зголемување на продуктивноста, изјави Дарко Лазаров од економскиот тим на ВМРО-ДПМНЕ, кој гостуваше вечерва во „Топ тема“ на Телма.

Според Лазаров, во таа насока, фокусот на идната програма на ВМРО-ДПМНЕ ќе биде во насока на зголемување на продуктивноста на македонските компании, нивно преструктуирање, зголемување на нивните технолошки способности и како тие би можеле да ја зголемат продуктивноста, а преку тоа да растат и платите во економијата, истакна тој.

ВМРО-ДПМНЕ неколку месеци апелираше до Владата предводена од СДСМ во делот на опасноста од вештачки, интервенистички зголемување на платите, кое е повеќе популизам отколку базирано на реални економски мерки.

Лазаров објасни која е разликата меѓу концептите на ВМРО-ДПМНЕ и СДСМ.

Концептот на СДСМ вели дека „ние ќе ја зголемиме минималната плата законски, во Собрание, а тоа ќе повлече спирала на зголемување на просечната плата“. Тоа нема да се случи затоа што, едноставно, не ја зголемуваат продуктивноста. Концептот на ВМРО-ДПМНЕ е дека ќе работиме системски на подобрување на продуктивноста која ќе предизвика пораст на просечната плата во земјата, а порастот на просечната плата автоматски, по пазарни принципи ќе ја зголеми најниската плата во државата. Минималната плата секаде во светот е инструмент да се заштитат социјално ранливите категории и оние работници кои се во трудоинтензивните дејности кои во одреден временски период не може да се преструктуираат, истакна Лазаров.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.