Проектот „Купи куќа купи стан“ не е осмислен на најдобар начин, бидејќи нема да им донесе многу корист на граѓаните кои сакаат да купат дом во Скопје! Вака тврдеа од СДСМ во 2012 година, во времето кога беа опозиција, а ВМРО ДПМНЕ беа на власт и го спроведуваа овој успешен проект, со чие посредство, многу семејства си обезбедија кров над главата.

Арно ама откако дојде на власт, СДСМ ја смени плочата, па сега одеднаш проектот „Купи куќа, купи стан“, е успешен. Сходно на тоа, тие го продолжуваат проектот кој го нарекуваа „режимски“.

Министерството за финансии соопшти дека граѓаните и годинава ќе можат да аплицираат за субвенција за станбен кредит од државата, преку проектот „Купи куќа, купи стан“. Објавен е јавен повик согласно кој ќе можат да поднесат барање заклучно 31 декември годинава за државна субвенција на учеството или месечната рата за купување на стан или на куќа.

Минатата година преку проектот се одобрени 278 барања за субвенциониран станбен кредит, од коишто 259 се за купување нов стан, а 19 за изградба на куќа.

Субвенцијата се одобрува за станбен кредит до 50.000 евра, чиј рок на отплата не е пократок од 20 години и може да достигне и до 20.000 евра, согласно избраниот модел на субвенционирање и висината на кредитот. Согласно избраниот модел субвенционираниот период може да биде и до 11 години.

Граѓаните можат да аплицираат за шест различни модели кои нудат различни поволности согласно тоа дали сакаат да аплицираат за субвенционирање на месечна рата на кредитот или за учество, во зависност од тоа дали аплицираат за купување на стан или куќа и во зависност од возраста. Повеќе за моделите може да се види на прирачникот објавен на веб-страната на Министерството за финансии.

Од Министерството за финансии велат дека каматната стапка за станбениот кредит преку проектот е исто така исклучително поволна. За моделите каде се субвенционира ратата за првите три години изнесува 2,9 проценти, а за четвртата и петата година 3,9 проценти. Кај моделите каде се субвенционира учеството, каматата изнесува четири проценти за цело времетраење на отплатата плус 6-месечен еурибор.

Дополнителна поволност која ја дава проектот за корисниците е дека за секое новородено или посвоено дете, ќе добијат дополнителна едногодишна субвенција на месечната рата во висина од 30 проценти.

За проектот може да аплицираат лица кои се или не се во брак, a кои ги исполнуваат следните услови: не смеат да имаат стан или куќа на свое име или на име на брачниот другар, месечните приходи не смеат да надминуваат 900 евра доколку не се во брак или 1.300 евра доколку се во брак, продажната цена на станбениот објект мора да биде до 900 евра за метар квадратен и станот и куќата кои се купуваат или градат мора да бидат новоградба, односно да се купат од инвеститор или изведувач. Исто така станбената површина не смее да надминува 150 метри квадратни.

Сите заинтересирани граѓани кои ги исполнуваат овие услови и се кредитноспособни согласно условите од банката можат да аплицираат во една од осумтте банки кои учествуваат во проектот: Тутунска банка, Стопанска банка-Скопје, Шпаркасе банка, Стопанска банка-Битола, Силк Роуд банка, ТТК банка, Охридска банка и Прокредит банка.

Вкупно од почетокот на проектот досега одобрени се 1.693 барања за купување на стан или куќа, или скоро 1.700 граѓани или семејства преку проектот дошле до сопствен дом.

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.