Македонија доби грант од Германија во висина од 2,4 милиони евра наменет за енергетска транзиција од традиционалните кон обновливите извори на енергија.

Средствата ќе ги користи „Електростопанство на Македонија“ (ЕСМ), а ќе бидат наменети за финансирање на изработката на физибилити студиите и студиите за влијанието врз животната средина за фотоволтаичните електрани во кругот на РЕК „Битола“, рехабилитацијата на шест големи хидроелектрани, ветерниот парк Миравци, модернизацијата и надградбата на комлексот на подржруницата „Енергетика“ во Скопје, како и за соларната топлификација од РЕК „Битола“ до општините Битола, Новаци и Могила.

Договорот беше потпишан во Владата од страна на генералниот директор на ЕСМ, Васко Ковачевски и директорот на KfW банката за Македонија и Косово, Рене Ешеманн, а на чинот на потпишување присуствуваа и премиерот Зоран Заев и германската амбасадорка Анка Холштајн.

Со средствата ќе се финансира изработката на физибилити студиите, студиите на влијанието на животната средина и социјалните аспекти на проектите без кои ниту еден проект не може да се реализира на терен. Овие средства ќе ни помогнат да ја затвориме финансиската рамка за првите фази на одредени проекти, а тоа ќе го забрза темпото на нивната реализација, истакна генералниот директор на ЕСМ, Васко Ковачевски, по потпишувањето на договорот.

Според премиерот Заев, со потпишувањето на денешниот договор земјава е еден чекор напред во исполнување на зацртаните цели од Стратегијата за развој на енергетиката до 2040 година и во имплементацијата на зеленото сценарио како најприфатливо за развој на државата.

Овие средства се обезбедени преку германската банка за развој, која е долгогодишен партнер на нашата земја преку нивните проекти за поддршка на економијата. Овие грант средства ни ставаат на располагање дополнителни 80, 5 милиони евра евтини кредити за изградба на енергетски објекти – изјави Заев.

Германската амбасадорка, Анка Холштајн, смета дека со грантот се поддржуваат зелените инвестиции во земјава.

Инвестициските проекти во обновливи извори на енергија што ЕСМ планира да ги реализира во следните пет години се во вредност од 500 до 600 милиони евра од кои дел ќе бидат финансирани од сопствени средства, дел со кредитни линии од европските финансиски институции и дел преку јавно приватно партнерство.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.