Дел од општините Центар и Карпош четири дена остануваат во дел од денот без струја.

Од компанијата ЕВН објаснуваа дека два дена по ред има краток прекин во снабдувањето со струја поради преоптовареност на мрежата, но корисниците за кратко време биле префрлени на други напојни точки. За вчерашниот прекин една од причинте за дефектот беше преоптовареноста на мрежата од греењето на дел од домаќинствата на струја, но и градежните активности кои се одвиваат на одделни места.

ЕВН соопшти дека попладнево во 15:50 часот настана прекин во снабдувањето со електрична енергија за корисниците кои се напојуваат од трафостаниците кои се поврзани на 110кВ далекувод Скопје 3 – Козле, во ТС Скопје 3.

На овој далекувод кој е во сопственост на ЕВН нема регистрирано дефект, туку не доаѓа електричната енергија од ТС Скопје 3 која е во сопственост на АД МЕПСО и потоа истата да се дистрибуира до корисниците. Која е причината за ова се утврдува, но за да не останат корисниците подолг период без електрична енергија тие беа префрлени на други напојни точки. За 40 минути сите корисници повторно беа вклучени во дистрибутивната мрежа, соопшти ЕВН.

Во соопштението ЕВН потсетува дека во изминатите два дена во истата ТС Скопје 3 на АД МЕПСО  реагираше заштитата при што во прекин беше 110 Кв врска на ЕВН Скопје 3-Запад.

Дел од корисниците од населбите Водно, Капиштец, Козле, Карпош 2, Ѓорче Петров, Влае, Тафталиџе, Сарај кратко време останаа без електрична енергија. Екипите на ЕВН веднаш реагираа, а корисниците беа префрлени на други напојни точки и беше нормализирано снабдувањето со електрична енергија, се наедува во соопштението.

МЕПСО реагираше на соопштението на ЕВН во врска со повремениот прекин на снабдувањето со електрична енергија на населби од централното подрачје на Градот Скопје, кое се случува од почетокот на оваа недела.

МЕПСО во ниту еден момент не го оставил без напојување со електрична енергија приклучното место на кое се поврзува електродистрибутивниот систем  во трансформаторската станица „Скопје 3“. Стручните тимови на МЕПСО веднаш излегоа на терен и проверките утврдија дека денеска немало дефект ниту прекин во напојувањето со електрична енергија од трансформаторската станица „Скопје 3“ на која е поврзана електродистрибутивната мрежа. Повеќе информации за причините за прекините во снабдувањето со електрична енергија ве упатуваме да побарате во Операторот на дистрибутивниот систем.

Објавените информации се погрешни и се пласирани пред да заврши целосната проверка на фактичката состојба со цел утврдување на причините за прекините во снабдувањето со електрична енергија. Овој чин на објавување не е во функција на градење и јакнење на меѓусебна доверба и партнерски односи меѓу компаниите кои оперираат со преносниот и со дистрибутивниот систем. МЕПСО како и секогаш досега ќе остане отворен за соработка со единствена цел непрекинато и сигурно снабдување на сите потрошувачи со квалитетна електрична енергија, се наведува во демантот на МЕПСО.

Кој и да е во право, граѓаните секако се во загуба. Четири дена најголените болници во градот, Клиничкиот центар, ГОБ „8 Септември“ и Клиниката „Жан Митрев“ работат на агрегати, сообраќајот е во колапс, во колапс се системите на банките, струја нема во домовите, а темепратурите едвај да се спуштиле под нула.

Од „ЕВН Македонија“ АД, во меѓувреме, најавија дека и утре делови од општините Илинден и Сопиште ќе останат без електрична енергија заради технички зафати.

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.