Трговците да не ја злоупотребуваат ситуацијата, а граѓаните да пријавуваат секаков прекршок, порача министерот за економија Крешник Бектеши. Во изминатите денови граѓаните пријавуваа дека основните производи ги нема на полиците во маркетите, а на социјалните медиуми имаше и информација од познат маркет дека нема масло за јадење на рафтовите, но со сметка над 800 денари граѓаните ќе добијат масло гратис.

Тој во емисија на „ТВ21“ истакна дека редовно и навремено се постапува по сите поплаки од страна на граѓаните во однос на нерегуларностите од страна на маркетите.

Веќе се казнети најголемите ланци на супермаркети, денеска бев информиран од страна на секторот во Министерството за економија, дека има поплаки за одреден супермаркет и веднаш го информиравме Државниот пазарен инспекторат, кој согласно моите информации веднаш постапил, изјави министерот нагласувајќи дека ако се повтори тој прекршок ќе следи дополнителна мерка.

Порача граѓаните редовно да ги земаат фискалните сметки и на бројот 191 да пријавуваат за секакви нерегуларности.

Трговците да не ја злоупотребат ситуацијата со цел да остварат дополнителен профит, а најважно да не создадат вештачка криза со тоа што ќе влијаат психолошки кај граѓаните да купуваат што повеќе производи, тоа не е потребно бидејќи имаме доволни количини, потенцира Бектеши.

Според него, имајќи ја предвид руско-украинската криза, следи година потешка и од времето на пандемијата.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.