Несреќата во која тракторист го загуби животот во атарот на селото Ливоишта се случила вчера околу 13 часот, покажа првичната истрага во врска со случајот.

Според СВР – Охрид, вчера во 13:15 часот во Службата за итна мединцинска помош била пријавена несреќата, во која животот го загубил 49-годишниот С.К. од Ливоишта. Полициската екипа што излегла на увид констатирала дека тој настрадал додека обработувал нива со трактор, при што изгубил контрола врз машината и дошло до превртување. Смртта ја констатирал лекар од Итната служба за мединцинска помош, а по наредба на Јавен обвинител телото на починатиот било дадено на обдукција.

Ливоишта се наоѓа десеттина километри северно од Охрид, на потегот меѓу селата Требеништа и Косел.

Несреќи како оваа се чести во земјата, тоа го потврдуваат и статистичките податоци. Според Македонското здружение за заштита при работа, најголемиот број несреќи во дејноста се случиле токму при манипулација со земјоделска машина – трактор, и тоа при вршење земјоделски работи, транспорт или при учество во сообраќај.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.