Приведен е кондуктер во Железници поради криумчарење мигранти, соопштија денеска од Министерството за внатрешни работи.

На Железничка станица Велес синоќа во 19.20 часот полициски службеници од СВР Велес го лишиле од слобода А.А., на возраст од 28 години, од Скопје, кондуктер во Железници. Кај него биле пронајдени вкупно 1.000 евра за кои постои сомнение дека потекнуваат од кривично дело по член 418 – б од Кривичниот законик, се појаснува во соопштението.

Претходно, околу 18.30 часот на Железничка станица Кукуричани, неготинско, во патнички воз, кој сообраќал на релација Гевгелија – Скопје, полициски службеници од Регионалниот центар за гранични работи Југ откриле две лица, мигранти од Сирија.

Во службен разговор во полициска станица, тие изјавиле дека на кондуктерот му дале пари за да влезат во возот, се наведува во соопштението.

А.А. бил задржан во полициска станица. По целосно документирање на случајот, во координација со јавен обвинител, ќе биде поднесена соодветна пријава.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.