Полицаецот П.Ѓ. кој загина синоќа на автопатот Тетово – Гостивар додека со колега го обезбедувал местото по случена сообраќајна несреќа, бил удрен од две возила.

МВР соопшти дека во двајцата полицајци, П.Ѓ. и Ф.Ш., во 19.05 часот удрило возило „форд фокус” управувано од 31-годишниот Р.Ш. од кичевското село Грешница, а потоа во П.Ѓ. удрило и возило „фолксваген голф” со тетовски ознаки управувано од 39-годишниот И.Б. од село Синичане, кое се движело од Гостивар кон Тетово.

Со возило на итна медицинска помош полицајците биле пренесени во Медицинскиот центар Гостивар, каде што кај П.Ѓ. е констатирана смрт, а кај Ф.Ш. тешки телесни повреди.

По наредба на јавен обвинител, возачот Р.Ш. е лишен од слобода во Полициска станица Гостивар.

Двајцата полицајци го обезбедувале местото на автопатот Тетово – Гостивар каде што 15-ина минути пред да бидат прегазени, се случила сообраќајка помеѓу „БМВ” управувано од Ѓ.Т. (20) од Гостивар и „пежо” што го возел Е.О.(49) од гостиварското село Речане. Во таа несреќа тешко се повредени три сопатнички во „пежото” – Ф.С.(51), О.Р.(48) и Д.Х.(27), сите од село Речане, и биле пренесени во Клиничкиот центар „Мајка Тереза”.

Увид на местото на настанот извршила увидна екипа на СВР Тетово.

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.