Во кривичниот суд во Скопје со сослушување на сведоците и оштетените за сообраќајната несреќа кај Ласкарци која се случи во февруари, продолжи судскиот процес за обвинетите во случајот.

Прва за несреќата сведочеше 22 годишна девојка која се здобила со фрактури и тешки телесни повреди. Таа не се сеќаваше на детали од несреќата бидејќи се онесвестила по ударот во првата ограда. Рече дека се приклучува на кривичното гонење и бара отштета.

Вториот сведок, Музафер Зибери, кој живеел покрај автопатот на стотина метри од местото каде што се преврте автобусот, рече дека го слушнал звукот на ударот во оградата и видел како се превртел автобусот.

Бев во дворот на куќата каде што падна автобусот. Го видов како се преврте и се стрчав одма со детето на брат ми. Одма го зедов возилото, за една минута бевме таму. Кога пристигнав автобусот беше во нива превртен со тркалата нагоре – рече Зибери.

Се присети дека имало чад и извици и го изнел веднаш апаратот за прва помош.

Под автобусот имаше дете заглавено со нозете кое викаше за помош. Зборуваше со татко му кого очајно го повикуваше: Тато дојди да ми помогнеш – се присети сведокот.

Зибери рече дека прво во автомобил го качил шоферот на автобусот заедно со уште двајца патници и ги однел во болница. Првин не знаел дека станува збор за шоферот, но потоа дознал. Сведокот кажа дека додека ги возел кон болницата, шоферот го удирал по ногата и му велел да вози побавно.

Обвинети за несреќата кај Ласкарци се сопственикот на компанијата „Дурмо Турс“, Дурмиш Белули, вработениот во компанијата „Дурмо Турс“, Ремзи Мифтари, машинскиот инженер Игор Ѓорѓиевски и возачот Маноил Трифуновски.

На обвинетите им се суди за тешки дела против безбедноста на луѓето и имотот во сообраќајот. Во сообраќајната несреќа загинаа 16 луѓе, а 38 беа тешко повредени.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.